Belgjika ka vendosur që të tërheqë ambasadorin e saj nga Korea e Jugut, pasi gruaja e tij është akuzuar për sulm ndaj dy punëtorëve të një dyqani në Seul.

Ministrja e Punëve të Jashtme të Belgjikës, Sophie Ëilmes, ka vendosur që në interesin më të mirë të marrëdhënieve dypalëshe të përfundojë mandatin e Ambasadorit Peter Lecuy, i cili ka qenë Ambasador në Seul për tre vjet, raporton AP, transmeton portal arbresh.info

Sipas raportit të ambasadës belge, ai i shërbeu vendit të tij me përkushtim, por situata aktuale nuk e lejon atë të vazhdojë të bëjë punën e tij në një mënyrë të qetë, dhe shtohet se autoritetet belge heqin dorë nga imuniteti diplomatik i ambasadorit,  në mënyrë që gruaja e tij të jetë në hetimin e policisë së Koresë së Jugut.

Sidoqoftë, Ministria e Punëve të Jashtme të Koresë së Jugut konfirmoi se Xiang kërkoi imunitet diplomatik, kështu që procesi gjyqësor u rrëzua.

Ambasadori ka kërkuar falje në emër të gruas së tij, ku përmes një video në Instagram ka theksuar se ajo edhe mund të kishte arsye të ishte e zemëruar me punonjësit e dyqanit, por që dhuna fizike e ushtruar është e papranueshme.

Sipas mediave të Koresë së Jugut, incidenti ndodhi kur një nga punonjësit e pyeti gruan e ambasadorit për xhaketën që mbante veshur, duke menduar se ajo mund ta kishte vjedhur atë.

Pamjet tregojnë se gruaja e ambasadorit e shtyu një punëtore para se ta godiste tjetrën në kokë.

Incidenti provokoi zemërimin e publikut, duke bërë që mijëra njerëz të nënshkruanin një peticion duke kërkuar dëbimin e gruas së ambasadorit nga vendi.

Sipas Konventës së Vjenës, në të cilën Koreja e Jugut është nënshkruese, diplomatët dhe familjet e tyre kanë të drejtën e imunitetit nga ndjekja penale, por ata mund ta heqin atë./arbresh.info/